Urola Kostako
Eskola Kirola
Urola Kostan 1990 urtetik daramagu Eskola Kirola antolatzen eta sustatzen. Urtetik urtera programan parte hartzen duten ikasle, guraso, entrenatzaile, epaile, eta kirol-koordinatzaileei esker bizirik eta indartsu jarraitzen du Eskola Kirolak gure eskualdean.
Helburuak
Eskola kirolaren xedeak 3 zutabetan oinarritzen dira:
Heziketa
- Haurren osotasunezko formakuntza (eta heziketa integrala) sendotu eta aberastu.
Haurraren garapen psikosoziala landu, gizartean hobeto txertatzea erraztuz. - Gizartean gehiengoak onartutako balio positiboak sustatu: taldelana, besteak eta arauak onartzea, errespetua, saiatzearen kultura…
- Eskola ordutegitik kanpoko testuinguruetan ere euskera erabiltzeko ohitura sustatu.
Ohitura osasuntsuak
- Aisialdian eta etorkizunean beren borondatez jarduera fisikoa egiten jarraitzeko jarrera bermatu.
- Biharko hiritarren osasun maila eta bizi-kalitatea hobetzen lagundu.
Motrizitatea
- Etorkizunean jarduera mota berrietara egokitu ahal izateko oinarrizko gaitasun orokorrak finkatu, bereziki kualitatiboak: koordinazioa, oreka, lateralitatea…
- Funtsezko kirol trebetasunak garatu, gerora errendimendura bideratzea posible eginaz.
EKAP Eskola Kirolaren Aldeko Plataformak 2013tik hona buruturiko lanaren errekonozimendua
2013an ESKOLA KIROLAren EGOERA bestelakoa zen eta Zarauzko hainbat herritar elkartu ziren berau sustatu eta babestu nahian. Plataforma honetan, besteak beste, Manu Urbieta, Naiara Badiola, Iñigo Izeta, Julen Irijalba, Xeber Iruretagoiena, Ane Kano, Eneritz Mayora, Nagore Martinez eta Eneko Landa ibili ziren lanean.
EKAP plataformako kideek eskola kirolaren garrantzia berreskuratzeko ekintza ugari burutu zituzten: Ikuslego Onaren Dekalogoa sortu zuten eta entrenamendu saioak eskaintzeko 150 ariketa bildu eta modu ulerterrazean zabaldu zituzten.
EKAP plataformak 300 harpidetu baino gehiagoren babesa lortu zuen.
Eskerrik asko EKAP kirol aniztasuna eta hezigarria bultzatzeko eginiko lanarengatik!